സ്ത്രീകൾക്ക് അവരുടെ ജീവിതത്തിലെ ഓരോ ഘട്ടത്തിലും വ്യത്യസ്തമായ പോഷകങ്ങളാണ് ആവശ്യമുള്ളത്. ഉദാഹരണത്തിന്, കൗമാരപ്രായക്കാർക്ക് ആർത്തവവിരാമം സംഭവിച്ച സ്ത്രീകളേക്കാൾ വ്യത്യസ്തമായ പോഷക ആവശ്യങ്ങളുണ്ട്, ഗർഭിണികൾക്കും മുലയൂട്ടുന്ന സ്ത്രീകൾക്കും ഗർഭിണികളല്ലാത്ത സ്ത്രീകളേക്കാൾ കൂടുതൽ പ്രത്യേക പോഷകങ്ങൾ ആവശ്യമാണ്.
ഓരോ സ്ത്രീയുടെയും മൊത്തത്തിലുള്ള ആരോഗ്യത്തെയും ജീവിതരീതിയെയും ആശ്രയിച്ച് പോഷക ആവശ്യകതകൾ വ്യത്യാസപ്പെടാം.
2023-ലെ UNICEF റിപ്പോർട്ട് അനുസരിച്ച്, ഒരു ബില്യണിലധികം കൗമാരക്കാരായ പെൺകുട്ടികളും സ്ത്രീകളും വിളർച്ച, പോഷകാഹാരക്കുറവ് എന്നിവയാൽ കഷ്ടപ്പെടുന്നു. സ്ത്രീകൾ അവരുടെ ആരോഗ്യത്തിന് ആവശ്യമായ പോഷകാഹാരങ്ങൾ കഴിക്കേണ്ടതുണ്ട്. ഇതിൽ പ്രധാനമായി 5 വിറ്റാമിനുകൾ ഉൾപ്പെടുന്നുണ്ട്. അവ എന്തൊക്കെയാണെന്നും അത് കഴിക്കേണ്ടതിന്റെ ആവശ്യമെന്താണെന്നും നോക്കാം.
വിറ്റാമിൻ എ
സ്ത്രീകളുടെ പ്രത്യുത്പാദന ആരോഗ്യത്തിന് ആവശ്യമായ ഒരു സുപ്രധാന വിറ്റാമിനാണ് വിറ്റാമിൻ എ. വളർച്ചയും വികാസവും, രോഗപ്രതിരോധ പ്രവർത്തനം, സെല്ലുലാർ ആശയവിനിമയം എന്നിവക്കെല്ലാം വിറ്റാമിൻ എ ആവശ്യമാണ്. കൂടാതെ സുപ്രധാന അവയവങ്ങളുടെയും മറ്റ് അവയവങ്ങളുടെയും സാധാരണ പ്രവർത്തനത്തിനും വിറ്റാമിൻ എ അത്യന്താപേക്ഷിതമാണ്.
ബി വിറ്റാമിനുകൾ
- കോശങ്ങളുടെ വികാസത്തിനും പ്രവർത്തനത്തിനും, പോഷകങ്ങളെ ഊർജമാക്കി മാറ്റുന്നതിനും, ഡിഎൻഎ, മസ്തിഷ്ക കോശങ്ങൾ
എന്നിവയുടെ രൂപീകരണത്തിനും വിറ്റാമിൻ ബി 3 അത്യന്താപേക്ഷിതമാണ്. - വിളർച്ച തടയുന്നതിലും ആർത്തവ പ്രശ്നങ്ങൾ കുറയ്ക്കുന്നതിലും ഗർഭകാലത്തെ ഓക്കാനം ചികിത്സിക്കുന്നതിലും വിറ്റാമിൻ ബി 6 ഒരു പ്രധാന പങ്ക് വഹിക്കുന്നു. സെറോടോണിൻ ഉൽപ്പാദിപ്പിക്കുന്നതിലൂടെ ആർത്തവവിരാമം നേരിടുന്ന സ്ത്രീകളിൽ വിഷാദരോഗ ലക്ഷണങ്ങളും ഇത് തടയുന്നു.
- വിറ്റാമിൻ ബി 9 എല്ലാ സ്ത്രീകൾക്കും ആവശ്യമുള്ള ഒരു സുപ്രധാന വിറ്റാമിനാണ്, പ്രത്യേകിച്ച് ഗർഭിണികൾക്ക് ന്യൂറൽ ട്യൂബ് വൈകല്യങ്ങൾ തടയുന്നതിനും കുഞ്ഞിൻ്റെ നട്ടെല്ലിനെയും തലച്ചോറിനെയും സംരക്ഷിക്കുന്നതിനും.
- ചുവന്ന രക്താണുക്കളുടെ രൂപീകരണത്തിനും സ്ത്രീകളിൽ വിളർച്ച തടയുന്നതിനും വിറ്റാമിൻ ബി 12 സഹായിക്കുന്നു. ഗർഭധാരണവും ജനനവുമായി ബന്ധപ്പെട്ട പ്രധാന പ്രത്യുൽപാദന പ്രശ്നങ്ങൾ ഉണ്ടാകാതിരിക്കാനും ബി 12 ആവശ്യമാണ്. കൂടാതെ, നാഡീകോശങ്ങളുടെ ആരോഗ്യത്തിനും വളരെ ആവശ്യമായ ഒരു വിറ്റാമിനാണ് വിറ്റാമിൻ ബി 12.
Also Read: ബി 12 ന്റെ കുറവ് നഖങ്ങളിൽ അറിയാം; ഇത് എങ്ങനെ പരിഹരിക്കാം?
വിറ്റാമിൻ സി
ശക്തമായ ആൻ്റിഓക്‌സിഡൻ്റാണ് വിറ്റാമിൻ സി. ഗർഭിണികളുടെയും മുലയൂട്ടുന്ന സ്ത്രീകളുടെയും മെച്ചപ്പെട്ട ആരോഗ്യത്തിന് ഇത് അത്യന്താപേക്ഷിതമാണ്. രോഗപ്രതിരോധത്തിന് പേരുകേട്ട വിറ്റാമിൻ സി സ്തനാർബുദത്തിൻ്റെയും മറ്റ് വിട്ടുമാറാത്ത രോഗങ്ങളുടെയും സാധ്യത കുറയ്ക്കുന്ന വിറ്റാമിനാണ്.
Also Read: ഈ പഴങ്ങളിൽ ഓറഞ്ചിനെക്കാൾ വിറ്റാമിൻ സി ഉണ്ട്
വിറ്റാമിൻ ഡി
കാത്സ്യം ആഗിരണം ചെയ്യുന്നതിന് വിറ്റാമിൻ ഡി അത്യന്താപേക്ഷിതമാണ്. ഇത് അമ്മമാരിൽ രക്തസമ്മർദ്ദം കുറയ്ക്കുകയും മാസം തികയാതെയുള്ള ജനനം കുറയ്ക്കുകയും ചെയ്യുന്നു. രോഗപ്രതിരോധ ശേഷി വർദ്ധിപ്പിക്കുകയും ഹോർമോണുകളെ സന്തുലിതമാക്കുകയും പ്രത്യുത്പാദന വ്യവസ്ഥയെ ഫലപ്രദമായി പ്രവർത്തിക്കാൻ സഹായിക്കുകയും ചെയ്യുന്നു. എല്ലുകളുടെ ആരോഗ്യത്തിന് ഏറ്റവും ആവശ്യമായ വിറ്റാമിനാണിത്.
Also Read: വേണം വൈറ്റമിൻ ഡി; ഈ ഭക്ഷണങ്ങൾ കഴിച്ചോളൂ
വിറ്റാമിൻ ഇ
പ്രതിരോധശേഷിയും ചർമ്മം, കണ്ണ് എന്നിവയുടെ ആരോഗ്യവും വർദ്ധിപ്പിക്കുന്ന ഒരു പ്രധാന ആൻ്റിഓക്‌സിഡൻ്റാണിത്. പ്രത്യുൽപാദന ആരോഗ്യം, ഹൃദയാരോഗ്യം, ഹോർമോൺ ബാലൻസ് എന്നിവയ്ക്കും വിറ്റാമിൻ ഇ അത്യാവശ്യമാണ്.
സ്ത്രീകളുടെ ദൈനംദിന ആരോഗ്യവും ക്ഷേമവും മെച്ചപ്പെടുത്തുന്നതിൽ വിറ്റാമിനുകൾക്ക് നിർണ്ണായക സ്ഥാനമുണ്ട്. ഹോർമോൺ, ആർത്തവ, പ്രത്യുൽപാദന വെല്ലുവിളികൾക്കിടയിൽ മികച്ച രീതിയിൽ പ്രവർത്തിക്കാൻ ആവശ്യമായ വിറ്റാമിനുകൾ ആവശ്യമാണ്. ഈ സുപ്രധാന വിറ്റാമിനുകളിൽ ഭൂരിഭാഗവും ഭക്ഷണത്തിലൂടെ ലഭിക്കും. എല്ലാ സ്ത്രീകൾക്കും പോഷക സപ്ലിമെൻ്റേഷൻ ആവശ്യമില്ലെങ്കിലും, ചിലർക്ക് ആവശ്യമുള്ള പോഷകങ്ങൾ ലഭിക്കാൻ സപ്ലിമെൻ്റുകൾ എടുക്കേണ്ടി വന്നേക്കാം. വിറ്റാമിൻ കുറവുണ്ടോ എന്ന് പരിശോധിച്ച് ഡോക്ടറുടെ നിർദേശപ്രകാരം ആവശ്യമുള്ള സപ്ലിമെൻ്റുകൾ കഴിച്ചുതുടങ്ങാം.
Also Read: 30 വയസ്സ് തികയാറായോ? സ്ത്രീകൾ ഈ കാര്യങ്ങൾ ചെയ്യുന്നതിനെക്കുറിച്ച് ആലോചിക്കൂ
Content Summary: 5 Vitamins Women Should Take for Their Overall Health