കേരളത്തിലും തമിഴ്‌നാട്ടിലും ദക്ഷിണേന്ത്യയുടെ മറ്റ് ഭാഗങ്ങളിലും പ്രചാരത്തിലുള്ള ഒരു ഭക്ഷ്യവിഭവമാണ് പൊറോട്ട. പ്രത്യേകിച്ച് മലയാളികൾക്ക് ഏറെ പ്രിയപ്പെട്ട ഭക്ഷണമാണ് പൊറോട്ട. നമ്മുടെ നാട്ടിലെ ഹോട്ടലുകളിൽ ഏറ്റവുമധികം ചെലവാകുന്ന വിഭവവും പൊറോട്ടയാണ്. രാവിലെയും ഉച്ചയ്ക്കും വൈകിട്ടുമൊക്കെ ഹോട്ടലുകളിൽ വൻതോതിൽ പൊറോട്ട ചെലവാകാറുണ്ട്. പൊറോട്ടയുടെ ആരോഗ്യഗുണത്തെക്കുറിച്ച് സോഷ്യൽ മീഡിയയിൽ ഉൾപ്പടെ വൻതോതിലുള്ള ചർച്ചകളും വാദപ്രതിവാദങ്ങളും നടന്നിട്ടുണ്ട്. ഏതായാലും പൊറോട്ടയുടെ പോഷകമൂല്യങ്ങളെക്കുറിച്ച് ഒന്ന് നോക്കാം…
മൈദ (ഫിൽട്ടർ ചെയ്ത ഗോതമ്പ് പൊടി), എണ്ണ അല്ലെങ്കിൽ നെയ്യ്, ഉപ്പ്, വെള്ളം എന്നിവ ഉപയോഗിച്ചാണ് പൊറോട്ട തയ്യാറാക്കുന്നത്. പൊറോട്ട ഒരു രുചികരവും ജനപ്രിയവുമായ ഭക്ഷണമാണെങ്കിലും, ഇത് ആരോഗ്യകരമായ ഭക്ഷണമായി കണക്കാക്കാനാകില്ല. പൊറോട്ടയെ സംബന്ധിച്ച് അറിഞ്ഞിരിക്കേണ്ട കാര്യങ്ങൾ എന്തൊക്കെയെന്ന് നോക്കാം.
1. ഉയർന്ന കലോറി
കലോറി കൂടുതലുള്ള ഭക്ഷണമാണ് പൊറോട്ട. ഒരു പൊറോട്ടയിൽ (ഏകദേശം 100 ഗ്രാം) ഏകദേശം 340 കലോറി അടങ്ങിയിട്ടുണ്ട്. വളരെയധികം കലോറി ഉപഭോഗം ശരീരഭാരം വർദ്ധിപ്പിക്കുകയും പൊണ്ണത്തടി, പ്രമേഹം ഉൾപ്പടെ നിരവധി ആരോഗ്യപ്രശ്നങ്ങൾക്കും ഇടയാക്കും.
2. പോഷകങ്ങൾ കുറവാണ്
മൈദ ഉപയോഗിച്ചാണ് പൊറോട്ട ഉണ്ടാക്കുന്നത്. മൈദ എന്ന് പറയുന്നത് ഗോതമ്പ് മാവ് പരമാവധി ഫിൽട്ടർ ചെയ്തതാണ്. അതിൽ നാരുകൾ, വിറ്റാമിനുകൾ, ധാതുക്കൾ എന്നിവ പോലുള്ള അവശ്യ പോഷകങ്ങൾ ഒന്നും തന്നെയില്ല. അതുകൊണ്ടുതന്നെ പൊറോട്ട ആരോഗ്യകരമല്ലെന്ന് ഉറപ്പിച്ച് പറയാനാകും.
3. ഉയർന്ന കൊഴുപ്പ്
നല്ല രീതിയിൽ നെയ്യ്, എണ്ണ, പാമോയിൽ, മുട്ട എന്നിവ ചേർത്താണ് പൊറോട്ട തയ്യാറാക്കുന്നത്. അതുകൊണ്ടുതന്നെ പൊറോട്ടയിൽ കൊഴുപ്പിന്‍റെ അളവ് വളരെ കൂടുതലാണ്. പ്രത്യേകിച്ച് പൂരിത കൊഴുപ്പാണ് പൊറോട്ടയിൽ കൂടുതലായി അടങ്ങിയിട്ടുള്ളത്. പൂരിത കൊഴുപ്പ് അമിതമായി കഴിക്കുന്നത് രക്തത്തിലെ കൊളസ്ട്രോൾ വർദ്ധിക്കാനും ഹൃദ്രോഗത്തിനും മറ്റ് ആരോഗ്യ പ്രശ്‌നങ്ങൾക്കും കാരണമാകും.
Also Read: ചിക്കൻ കഴിക്കുന്നത് നല്ലതോ? എന്തൊക്കെയാണ് ഗുണങ്ങൾ?
4. ദഹനപ്രശ്‌നങ്ങൾ
ദഹിക്കാൻ ഏറെ പ്രയാസമുള്ളതാണ് മൈദ. അതുകൊണ്ടുതന്നെ മൈദ ഉപയോഗിച്ച് തയ്യാറാകുന്ന പൊറോട്ട ദഹനപ്രശ്നങ്ങൾക്ക് ഇടയാക്കുന്നു. മൈദ അമിതമായി കഴിക്കുന്നത് വയറിളക്കം, മലബന്ധം തുടങ്ങിയ ദഹനപ്രശ്നങ്ങൾക്ക് കാരണമാകും.
പൊറോട്ട ഒരു രുചികരവും ജനപ്രിയവുമായ ഭക്ഷണമായിരിക്കാമെങ്കിലും, അത് ആരോഗ്യകരമായ ഭക്ഷണമായി കണക്കാക്കില്ല. സമീകൃതാഹാരത്തിന്റെ ഭാഗമായി ഇത് മിതമായ അളവിൽ കഴിക്കണം.
Content Summary: 4 Reasons why eating porota is a bad choice for health