മൂക്കിന് ചുറ്റുമായി കാണപ്പെടുന്ന വായു നിറഞ്ഞ അറകളാണ് സൈനസുകൾ. ഇവ പാരാനേസൽ സൈനസുകൾ എന്നറിയപ്പെടുന്നു. നാല് ജോഡി സൈനസ് അറകളാണ് നമുക്കുള്ളത്. പുരികത്തിനു തൊട്ടു മുകളിൽ, മൂക്കിന്റെ പാലത്തിന് തൊട്ടു മുകളിൽ, കണ്ണിന്റെ പുറക് വശത്ത്, കണ്ണുകൾക്ക് താഴെ മൂക്കിന് ഇരുവശത്ത് എന്നിങ്ങനെയാണ് ഇവയുടെ സ്ഥാനം. സാധാരണയായി ഇവ നന്നായി വായുസഞ്ചാരമുള്ള അറകൾ പോലെയാണ്. ഇവിടെ ഒരു തടസം ഉണ്ടാകുമ്പോൾ അത് സൈനസുകളിൽ വീക്കം, ദ്രാവകം ശേഖരിക്കൽ, മൂക്കിലും സൈനസുകളിലും ടിഷ്യുവിന്റെ അധിക വളർച്ച എന്നിവക്ക് കാരണമാകുന്നു. രോഗിക്ക് ഇടയ്ക്കിടെയുള്ള മൂക്കിൽ തടസം ഉണ്ടാകുക, മൂക്കിൽ നിന്ന് സ്രവങ്ങൾ തൊണ്ടയിലേക്ക് ഇറങ്ങുക, തലവേദന, മുഖത്ത് വേദന, മണം നഷ്ടപ്പെടൽ, അമിതമായ തുമ്മൽ, അസ്വസ്ഥമായ ഉറക്കം തുടങ്ങി നിരവധി ലക്ഷണങ്ങൾ രോഗിക്ക് ഉണ്ടായിരിക്കാം. ചില പുതിയ പഠനങ്ങൾ പറയുന്നത് അനുസരിച്ച് ദീർഘകാല സൈനസ് പ്രശ്‌നങ്ങൾ ഏകാഗ്രതക്കുറവിലേക്കും ഓർമ്മശക്തി കുറയാനും കാരണമേകുമെന്നാണ്. സൈനസൈറ്റിസ് രോഗികളിൽ വിഷാദം, ഉത്തേജകങ്ങളോട് പ്രതികരിക്കാനുള്ള കഴിവ് തുടങ്ങിയ നാഡീസംബന്ധമായ പ്രശ്‌നങ്ങൾ ഉണ്ടാകാനുള്ള സാധ്യതയും കൂടുതലാണെന്ന് പഠനങ്ങൾ സൂചിപ്പിക്കുന്നു.
ഉറക്കമില്ലായ്മ, പകൽ മയക്കം, അലസത, പഠനത്തിലോ ജോലിയിലോ ശ്രദ്ധ കേന്ദ്രീകരിക്കാനുള്ള കഴിവില്ലായ്മ, സാമൂഹിക സാഹചര്യങ്ങളുമായി പൊരുത്തപ്പെടാനുള്ള ബുദ്ധിമുട്ട് തുടങ്ങിയ ലക്ഷണങ്ങളുമായി സൈനസൈറ്റിസ് രോഗികൾ ഇഎൻടി വിഭാഗത്തിലേക്ക് വരുന്നു. വളരെ ചെറിയ കുട്ടികൾ മുതൽ പ്രായമായവർ വരെ എല്ലാ പ്രായക്കാർക്കും സൈനസൈറ്റിസ് ബാധിക്കാം. കാലാവസ്ഥയിലെ മാറ്റം, മലിനീകരണം, പൊടി അലർജി മുതലായവ ഇതിന് കാരണമാകാം. ആരോഗ്യരംഗത്തെ പുരോഗതി ഇന്ന് സൈനസൈറ്റിസ് ഫലപ്രദമായി നേരിടാൻ സഹായകരമാണ്. നേസൽ എൻഡോസ്കോപ്പിയിലൂടെ മൂക്കിന്റെ സി ടി സ്കാൻ എടുക്കാൻ സാധ്യമാണ്.
Also Read: സൈനസ് അണുബാധ തലച്ചോറിലേക്ക് പടരുന്നതിന്റെ ലക്ഷണങ്ങൾ
സൈനസൈറ്റിസ് ചികിത്സയുടെ ആദ്യ ഘട്ടത്തിൽ ആൻറിബയോട്ടിക്കുകൾ, ആൻറി-ഇൻഫ്ലമേറ്ററികൾ, ആന്റി-ഹിസ്റ്റാമൈനുകൾ, സ്റ്റിറോയിഡ് സ്പ്രേകൾ, കഠിനമായ കേസുകളിൽ ഓറൽ സ്റ്റിറോയിഡുകൾ, ഇമ്മ്യൂണോതെറാപ്പി എന്നിവ ഉൾപ്പെടുന്നു. മിക്ക ദീർഘകാല രോഗികളും ഒന്നിലധികം കോഴ്സുകൾ എടുക്കുന്നു. അത്തരം സന്ദർഭങ്ങളിൽ സൈനസുകളുടെ ആവർത്തിച്ചുള്ള വീക്കം ക്ലിനിക്കൽ ചിത്രത്തെ കൂടുതൽ വഷളാക്കുന്നു. ആൻറിബയോട്ടിക് ദുരുപയോഗവും സ്ഥിതി സങ്കീർണ്ണമാക്കുന്നു. മരുന്നുകളോട് നന്നായി പ്രതികരിക്കുന്നില്ലെങ്കിലോ കൂടുതൽ സങ്കീർണതകൾ ഉണ്ടെങ്കിലോ ശസ്ത്രക്രിയ ചെയ്യാനുള്ള സംവിധാനവും ഇന്ന് ലഭ്യമാണ്. ഫങ്ഷണൽ എൻഡോസ്കോപ്പിക് സൈനസ് സർജറിയാണ് ഏറ്റവും സാധാരണമായ ശസ്ത്രക്രിയ. സൈനസ് വെന്റിലേഷനെ തടയുന്ന ഏതെങ്കിലും ബ്ലോക്കുകൾ നീക്കം ചെയ്യുകയും ഏതെങ്കിലും അണുബാധയുള്ള ടിഷ്യുവിന്റെ സൈനസ് കളയുകയും ചെയ്യുക എന്നതാണ് ശസ്ത്രക്രിയയുടെ ലക്ഷ്യം. ഇതോടൊപ്പം, മൂക്കിന്റെ ഘടനയെ ആശ്രയിച്ച് മൂക്കിലൂടെ സ്വതന്ത്രമായി ശ്വസിക്കാൻ മതിയായ ദ്വാരം സൃഷ്ടിക്കപ്പെടുന്നു. വൈദ്യശാസ്‌ത്രരംഗത്തെ പുത്തൻ മുന്നേറ്റങ്ങൾ ചികിത്സയുടെ ഫലപ്രാപ്തിയും ശസ്ത്രക്രിയയ്ക്കുശേഷം പെട്ടെന്ന് സാധാരണ ജീവിതത്തിലേക്ക് മടങ്ങിവരാനും സാധ്യതയൊരുക്കുന്നു.
Also Read: ക്ഷീണം മാറുന്നില്ലേ? ശരീരത്തിന് തളർച്ച അനുഭവപ്പെടാനുള്ള കാരണങ്ങൾ അറിയാം
സൈനസൈറ്റിസ് ദൈനം ദിന ജീവിതത്തെ ഏറെ ബുദ്ധിമുട്ടിലാക്കുന്ന ഒരു അസുഖമാണ്. രോഗലക്ഷണങ്ങൾ നേരത്തേ തിരിച്ചറിയാനും ഇഎൻടി സ്പെഷ്യലിസ്റ്റുകളിൽ നിന്ന് സമയബന്ധിതമായി ഉപദേശം തേടാനും ഉപേക്ഷ കാണിക്കരുത്.
Content Summary: Sinus Infection (Sinusitis): Risk factors and treatment