കോവിഡ് ഉൾപ്പടെയുള്ള പ്രതിരോധ വാക്സിനുകൾക്ക് നല്ല ഫലം കിട്ടണമെങ്കിൽ ഉറക്കം പ്രധാനമാണെന്ന് പുതിയ പഠനം പറയുന്നു. വാക്സിൻ എടുക്കുന്നതിന് മുമ്പും ശേഷവും കുറഞ്ഞത് 7 മണിക്കൂർ ഉറങ്ങിയെങ്കിൽ മാത്രമെ വാക്സിൻ ഫലപ്രദമായി പ്രവർത്തിക്കുകയുള്ളത്രെ.
കുറഞ്ഞത് 7 മണിക്കൂറെങ്കിലും ഉറങ്ങുന്ന ആളുകളെ അപേക്ഷിച്ച് ഉറക്കക്കുറവുള്ളവരിൽ വാക്സിൻ എടുക്കുന്നതിന് മുമ്പും ശേഷവുമുള്ള ദിവസങ്ങളിൽ ശരീരത്തിലെ വൈറസുകളെയും ബാക്ടീരിയകളെയും തിരിച്ചറിയുകയും നശിപ്പിക്കുകയും ചെയ്യുന്ന ആന്റിബോഡികൾ വളരെ കുറച്ച് മാത്രമേ ഉൽപ്പാദിപ്പിക്കുന്നുള്ളൂവെന്നാണ് പഠനത്തിൽ കണ്ടെത്തിയിരിക്കുന്നത്. ഇത്തരക്കാരിൽ പല വാക്‌സിനുകളുടെയും ഫലപ്രാപ്തി കാലക്രമേണ കുറയുന്നതിനാൽ, ബൂസ്റ്റർ വാക്‌സിന്റെ സംരക്ഷണം 2 മാസം വരെ മാത്രമായിരിക്കുമെന്നും ഗവേഷകർ കണ്ടെത്തി.
“നല്ലതുപോലെ ഉറങ്ങുമ്പോൾ വാക്‌സിനിൽനിന്ന് ലഭിക്കുന്ന സംരക്ഷണത്തിന്റെ ദൈർഘ്യം വർദ്ധിക്കും,” ഗവേഷകയും ചിക്കാഗോ സർവകലാശാലയിലെ പ്രൊഫസറുമായ ഈവ് വാൻ കൗട്ടർ പറഞ്ഞു.
കറന്റ് ബയോളജി ജേർണലിൽ കഴിഞ്ഞ ദിവസം പ്രസിദ്ധീകരിച്ച പഠനം അനുസരിച്ച്, ഉറക്കവും ഫ്ലൂ, ഹെപ്പറ്റൈറ്റിസ് എന്നിവയ്‌ക്കുള്ള വാക്‌സിനുകളുടെ ഫലപ്രാപ്തിയും തമ്മിലുള്ള ബന്ധത്തെക്കുറിച്ചുള്ള മുൻകാല ഗവേഷണങ്ങളെ പുനർവിശകലനം ചെയ്തു. ഒരേ കോവിഡ്-19 വാക്സിനുകൾ സ്വീകരിച്ചതിന് ശേഷം ആളുകൾ വ്യത്യസ്ത തലത്തിലുള്ള പ്രതിരോധശേഷി വികസിപ്പിച്ചെടുത്തതിന്റെ സൂചനകൾ കാരണം ഈ ബന്ധം മനസ്സിലാക്കാനാണ് ഗവേഷകർ ശ്രമിച്ചത്. കോവിഡ് വാക്‌സിനുകളും ഉറക്കവും തമ്മിൽ ബന്ധപ്പെടുത്തുന്ന പഠനങ്ങൾ ഇതുവരെ ലഭ്യമല്ല, അതിനാൽ നിലവിലുള്ള പഠനങ്ങൾ വിലയിരുത്താനും ആ കണ്ടെത്തലുകൾ കോവിഡ് വാക്‌സിനുകളെ കുറിച്ച് അറിയാവുന്നവയിലേക്ക് വിവർത്തനം ചെയ്യുകയുമാണ് ഗവേഷകർ ചെയ്തത്.
“നമ്മൾ കോവിഡ്-19-നുള്ള mRNA വാക്‌സിനോ ഇൻഫ്ലുവൻസ, ഹെപ്പറ്റൈറ്റിസ്, ടൈഫോയിഡ് അല്ലെങ്കിൽ ന്യൂമോകോക്കൽ വാക്സിൻ ഉപയോഗിച്ചാലും രോഗപ്രതിരോധ സംവിധാനത്തെ എങ്ങനെ ഉത്തേജിപ്പിക്കുന്നു എന്നത് ഒരുപോലെയാണ്. ഇതൊരു പ്രോട്ടോടൈപ്പിക്കൽ ആന്റിബോഡി അല്ലെങ്കിൽ വാക്സിൻ പ്രതികരണമാണ്, അതുകൊണ്ടാണ് നമുക്ക് കോവിഡിലേക്ക് സാമാന്യവൽക്കരിക്കാൻ കഴിയുമെന്ന് ഞങ്ങൾ വിശ്വസിക്കുന്നത്” മാനസിക പ്രക്രിയകൾ, നാഡീവ്യൂഹം, പ്രതിരോധശേഷി എന്നിവ തമ്മിലുള്ള ബന്ധത്തിൽ വൈദഗ്ദ്ധ്യം നേടിയ അമേരിക്കൻ ഗവേഷകനായ മൈക്കൽ ഇർവിൻ സിഎൻഎന്നിനോട് പറഞ്ഞു.
ഗവേഷകർ വിവിധ ഗ്രൂപ്പുകളിലെ വാക്സിൻ പ്രതികരണം പരിശോധിച്ചപ്പോൾ, ഉറക്കത്തിന്റെ ഫലങ്ങൾ പുരുഷന്മാരിലും 18 മുതൽ 60 വയസ്സുവരെയുള്ള ആളുകളിലുമാണ് ഏറ്റവും കൂടുതൽ. സ്ത്രീകളിലെ ഹോർമോണുകളുടെ അളവിലെ വ്യതിയാനങ്ങൾ രോഗപ്രതിരോധ സംവിധാനത്തെ ബാധിക്കുന്നതിനാൽ സ്ത്രീകളിലെ ഫലങ്ങളെക്കുറിച്ച് കൂടുതൽ ഗവേഷണം ആവശ്യമാണെന്ന് ഗവേഷകർ പറഞ്ഞു.
65 വയസും അതിൽ കൂടുതലുമുള്ളവരിൽ ഉറക്കക്കുറവ് വാക്സിൻ ഫലപ്രാപ്തിയെ സാരമായി ബാധിച്ചിട്ടില്ലെന്നും അവർ കണ്ടെത്തി. പ്രായമായ ആളുകൾ ഇതിനകം ചെറുപ്പക്കാരേക്കാൾ കുറച്ച് ഉറങ്ങുന്ന പ്രവണതയാണ് ഇതിന് കാരണമെന്ന് ഗവേഷകർ അഭിപ്രായപ്പെട്ടു.
“കോവിഡ്-19 വാക്സിനുകൾ നൽകുന്ന സംരക്ഷണത്തിലെ വ്യതിയാനം കാണുമ്പോൾ – ഉറക്കക്കുറവുള്ള ആളുകൾക്ക് സംരക്ഷണം കുറവാണ്, പുരുഷന്മാർക്ക് സ്ത്രീകളേക്കാൾ സംരക്ഷണം കുറവാണ്, അമിതവണ്ണമുള്ള ആളുകൾക്ക് അമിതവണ്ണമില്ലാത്ത ആളുകളേക്കാൾ വാക്സിനിൽനിന്നുള്ള സംരക്ഷണം കുറവാണ്. ലിംഗവ്യത്യാസം, അമിതവണ്ണം എന്നിവ ഒരു വ്യക്തിക്ക് നിയന്ത്രണമില്ലാത്ത ഘടകങ്ങളാണ്, എന്നാൽ ഉറക്കം ശരിയാക്കാൻ ഒരു വ്യക്തി വിചാരിച്ചാൽ സാധിക്കും. അത് വാക്സിൻ ഫലപ്രദമായി പ്രവർത്തിക്കാൻ സഹായിക്കും”- വാൻ കൗട്ടർ പറഞ്ഞു.
Content Summary: To get the vaccine to be effective, you need to sleep well.